C.B. BREOGÁN

01/07/2010

O Consello presentou o proxecto a representantes empresariais

Haz click sobre la imagen para ampliarla

Ao longo da tarde do xoves, o Consello de Administración do CB Breogán realizou unha ampla reunión con representantes das principais asociacións empresariais, comerciais e hostaleiras de Lugo. O balance foi moi satisfactorio para tódalas partes. Antón Bao agradeceu a participación dos asistentes e recibiu tamén o agradecemento por parte de aqueles por contar con eles para o proxecto social e deportivo Breoganista.

O Consello de Administración celeste ao completo mantivo un encontro con Eduardo Núñez Torrón, vicepresidente de la Cámara de Comercio; o secretario xeral da Confederación de Empresarios de Lugo (CEL), Jaime López; o presidente da Asociación Provincial de Empresarios de Hostalería de Lugo (APEHL), Cheché Real;
Ángel López Lugilde Presidente de la Asociación de Empresarios del Polígono de O Ceao, e o presidente de la Federación de Comercio de Lugo, José María Seijas.

Da xuntanza saíu o compromiso de elaborar un catálogo de posibles colaboracións para adaptalas ás posibilidades de cada empresa colaboradora, no que terán cabida dende a Fundación BALOGAL para o deporte base e actividade social, e a propia Sociedade Anónima Deportiva. O órgano reitor do Breogán reiterou o ofrecemento para que empresarios se unan ao Consello de Administración e mesmo a posibilidade de que, co respaldo de todos, algún deles poida asumir a presidencia do proxecto.
Antón Bao e o resto do Consello expresaron a idea de que o proxecto está máis aberto que nunca, que ninguén se debe sentir fora dun Breogán que debe ser de todos.
O Vicepresidente Primeiro da Deputación agradeceu a asistencia dos representantes dos sectores empresariais: «estamos moi agradecidos pola resposta e seguiremos establecendo contactos para que o Breogán sexa un proxecto de todos».
Os representantes empresariais tamén agradeceron aos membros do Consello o feito de ter dado o paso de contar con eles e facelos partícipes do futuro do Breogán cun proxecto social e atractivo para todos, especialmente para as familias, que tradicionalmente acoden de xeito moi representativo ás gradas do Pazo cada sábado.

Reunión extraordinaria de Consello

Finalizada a rolda de contactos con representantes empresariais, o Consello de Administración realizou unha xuntanza para abordar outros temas de xestión da entidade. Desa reunión saíu o compromiso de tomar, dende xa, decisións para comezar a conformar o plantel deportivo de cara á temporada 2010/2011. Nos próximos días podería haber novas relacionadas con esa parcela.