Vitoria que certifica ser primeiros ao final da primeira volta e a organización da Copa Princesa
Partido intenso e espectacular o que ofreceron no Pazo para despedir o ano Cafés Candelas Breogán e Leyma Básquet Coruña. O «Derbi Romano» non defraudou e tivo de todo: xogadas espectaculares, tensión, rivalidade máxima en tódalas liñas e un ambientazo na grada.
O encontro desenvolveuse con bastante igualdade no eletrónico con lixeiras vantaxes locais pero que nunca chegaron a ser definitivas (40-34 ao descanso).
O Leyma demostrou que é un equipo chamado a estar arriba e evitou en todo momento que os celestes estiveran cómodos no partido. Pero os homes de Lezkano souperon sufrir e tirar de defensa nos minutos nos que atopou freo en ataque e así chagou ao momento clave no que unha serie de accións entre o final do terceiro cuarto e o inicio do derradeiro, con dúas triplas consecutivas de Sulejmanovic incluídas, daban unha cómoda vantaxe aos locais (67-52) que administraron ata o final si ben os laranxas non deron o partido por perdido en ningún momento.
Vitoria moi traballada por parte de todo o equipo aínda que a actuación dun home: Matt Stainbrook, merece ser resaltada cos seus 16 puntos, 8 rebotes e 4 asistencias, 3 recuperacións e 9 faltas recibidas, para 31 de valoración. Dato salientable especialmente tendo encoenta que diante tivo durante moitos minutos a homes como Sonseca e Olmos, a quen desesperou por momentos.
