O Breo volve a rozar a centena de puntos ante un rival que mantivo o pulso durante a primeira metade
Importante vitoria celeste no derbi disputado en A Raña. O partido comezou con anotación compulsiva por parte dos dous equipos que asinaban un 30-31 ao fin do primeiro cuarto. Pouco a pouco as defensas foron axustándose e o nivel anotador baixou de nivel, pero mantíñase a igualdade ao descanso (46-49).
Pero na segunda parte o Breogán fixo valer a súa maior rotación e desgastou ao Marín que competiu ata que as forzas comezaron a fallar, chegando ao final con vitoria celeste por un claro 77-99.
O Marín Ence Peixegalego apura as súas opcións de manter a categoría neste tramo final de competición. Dende o CB Breogán desexamos toda a sorte a un equipo galego con afección e méritos para estar o máis alto posible dentro do panorama nacional.
O Cafés Candela s estivo acompañado, unha vez máis, pola espectacular marea Celeste, que superaba os 300 efectivos que levaron as cores e os cánticos breoganistas ás gradas de A Raña.
Agradecemos unha vez máis o alento dunha afección incansable que enche de orgullo ao equipo.
A próxima parada, no Pazo, ante Palma Air Europa o vindeiro sábado día 8 ás 19:15 horas.
