O equipo que representa ao Río Breogán na primeira fase está preparado para a cita en Valencia
A contorna de L’Alqueria del Basket e A Fonteta será o epicentro da primeira fase da Minicopa Endesa 2025. O Río Breogán presenta un equipo formado por unha selección de xogadores de equipos da provincia de Lugo, vinculados ao proxecto Breogán Academy, que impulsa o seguimento e a colaboración con todos os clubes de formación.
Doce xogadores —Íker Bouzas, Bruno Fernández, Hugo Fernández, Diego Cortizas, Manu Real, Mateo Quintela e Guillermo Carcedo (do Estudiantes Lugo); Nicolás Pérez, Rodrigo Quintero e Fabián Valcárcel (do Ensino Lugo); Pablo Domínguez (do CB Sarria) e Hugo Castedo (do Sagrado Corazón)— son os seleccionados para representar o Breogán.
Un seleccionador nacional como adestrador
O equipo celeste conta co privilexio de ter a Miguel Ángel Hoyo, seleccionador de Costa de Marfil, como adestrador. O técnico posúe unha ampla experiencia dirixindo equipos tanto de formación como profesionais. Licenciado en Educación Física, Hoyo dirixiu conxuntos en LEB Ouro, EBA e LEB Prata; foi asistente na ACB (Breogán, Granada); dirixiu equipos profesionais en diversas ligas, como Malabo Kings (Guinea Ecuatorial), Horsholm 79ers ou SISU Copenhagen (Dinamarca), e BC Sibiu (Romanía); foi asistente na liga turca e dirixiu equipos filiais do Baskonia. Actualmente é director deportivo do club de formación CB Sarria. Unha ampla experiencia da que xa aprenden os xogadores do Río Breogán da Minicopa.
Unha asistente con experiencia na cancha
Paula Fernández-Ahuja é a adestradora axudante do equipo celeste. Adestradora de equipos de formación no Club Estudiantes Lugo, Paula foi xogadora en equipos destacados como o Celta de Vigo e conta cunha ampla traxectoria en categorías formativas, sendo xa axudante do equipo do Breogán que participou en edicións anteriores da fase previa da Minicopa Endesa. Docente de formación, Paula achegará o seu talento e coñecementos ao equipo que representará o Breogán en Valencia.
O capitán do Río Breogán, xefe de expedición
O equipo celeste que xogará en Valencia ten a sorte de contar co capitán do equipo de Liga Endesa como responsable do grupo. Poucos días despois de xogar no Pazo ante o San Pablo Burgos e axudar a lograr a cuarta vitoria en Liga Endesa, o capitán vestirá a indumentaria da Minicopa para acompañar o equipo de formación, xestionado desde o proxecto Breogán Academy, que tamén dirixe.
No desprazamento do Río Breogán tamén estará o responsable de comunicación celeste, Marcos Fernández.
Tres citas de alta esixencia
O Río Breogán quedou encadrado no Grupo D e verase as caras con tres equipos de canteira de Liga Endesa. O primeiro partido será poucas horas despois de aterrar en Valencia: o venres 28 ás 20:15, na pista central de L’Alqueria del Basket, ante o Casademont Zaragoza. A segunda cita será o sábado 29 ás 13:15 en A Fonteta, ante o Joventut, e ese mesmo día, ás 19:45, disputarán o terceiro encontro programado ante o Baskonia.
Todos os partidos serán ofrecidos en directo a través da canle oficial de YouTube da Liga Endesa.
Moito máis que partidos
A axenda de “Os Rapaces” non dará tregua. A experiencia da fase previa da Minicopa é intensa para os participantes. Haberá tempo para visitas culturais, gravación de contidos, asistencia a outros partidos, actividades conxuntas con equipos formados por persoas con diversidade funcional e, ademais, todos os participantes terán a oportunidade de participar na cerimonia de entrega de medallas o domingo 30.
O equipo do Río Breogán vivirá unha experiencia de primeiro nivel baixo a organización da ACB, algo ao alcance de poucos e nun contorno do que xurdiron algúns dos grandes xogadores que hoxe brillan no panorama profesional. Os partidos e a convivencia serán inesquecibles para eles. Toca gozar.
