O interior internacional montenegrino vestirá a camiseta celeste na tempada 2026/27 na Liga Endesa
Aleksa Ilić é un pivote de 2,05 metros e 29 anos cunha sólida carreira na liga Adriática, sendo ademais un habitual na selección nacional de Montenegro.
Ilić procede do SC Derby de Podgorica, onde foi o segundo xogador mellor valorado da pasada tempada cunha media de 20 de valoración alén de promediar 15,2 puntos e 8 rebotes en 26 partidos disputados, cun 72,6% de acerto en tiros de dous puntos, un 77% en tiros libres e case dous tapóns de media por encontro.
O novo xogador del Río Breogán desenvolveu gran parte da súa carreira no Budućnost e conta cunha ampla experiencia en competicións europeas como a Eurocup, a Euroliga e a BCL.
Ilić é un pivote con gran envergadura de brazos, bo intimidador e con notable mobilidade; un bo defensor que ademais destaca polo seu talento para o rebote e a anotación, sendo especialmente efectivo en posicións próximas ao aro.
Coa incorporación de Ilić, que se suma ás renovacións de Brankovic, Alonso, Mavra, Aranitovic e Andric, a dirección deportiva do Breogán segue traballando para pechar un persoal de alto nivel competitivo para a tempada 2026/27, a sexta consecutiva na máxima categoría e que coincide coa celebración do 60 aniversario do club celeste.
