Celebrado o segundo Clinic organizado por Breogán Academy
O centro lucense María Auxiliadora acolleu unha xornada formativa dirixida a adestradores de baloncesto, na que participaron destacados profesionais do ámbito deportivo.
Entre os relatorios impartidos, Fernán Varela, técnico axudante do Breogán, abordou os fundamentos individuais con transferencia ao bloqueo directo. Pola súa parte, Pablo Abuín, seleccionador galego cadete e axudante na selección de Costa de Marfil, centrou a súa intervención na defensa do bloqueo directo en etapas formativas. Completou o programa Luis Abel Taboada, director da Fundación Breogán e experto en coaching deportivo, quen reflexionou sobre o papel do adestrador como arquitecto a través do deporte.
Ás xornadas asistiron adestradores de formación, cuxa participación valida seis horas de formación grazas ao acordo entre a Breogán Academy e a Federación Galega de Baloncesto, a través da súa escola de adestradores. A asistencia foi de balde para os técnicos pertencentes a clubes vencellados ao proxecto Breogán Academy.
Esta iniciativa forma parte das múltiples actividades que o proxecto Academy impulsa en favor da formación continua e da colaboración entre clubs e a federación, co obxectivo de fomentar o desenvolvemento do baloncesto.
