O pívot croata seguirá achegando presenza na pintura, calidade e centímetros ao equipo celeste
O Río Breogán chegou a un acordo para que Danko Brankovic vista unha tempada máis a camiseta do equipo lucense.
O internacional croata, de 2,17 metros e 25 anos, é un dos teitos da competición e foi unha das bazas importantes do equipo na excelente tempada recén rematada. Brankovic asinou uns grandes rexistros, achegando de media en tan só 17 minutos de xogo: 11,3 puntos (69,1% T2, 37,2% T3, 79,1% TL), 5 rebotes, 1,3 mates (o 5.º da liga) e algo máis dun tapón por encontro, nos 34 partidos da competición.
A súa excelente adaptación ao xogo proposto por Luis Casimiro, a súa evolución e importancia dentro do equipo e da Liga Endesa, e a súa grande proxección, converten a continuidade de Brankovic nunha das grandes noticias para a configuración do novo plantel celeste de cara á tempada 2026/27.
A renovación de Brankovic súmase ás xa anunciadas de Mavra, Alonso, Aranitovic e Andric, confirmando así a continuidade de cinco xogadores importantes, un por posición, ademais da do corpo técnico liderado por Luis Casimiro, o que constitúe unha base sólida e afianza unha clara idea de continuidade e estabilidade no proxecto deportivo celeste.
