Edgar Vicedo, presentado oficialmente nas instalacións de Estrella Galicia en Lugo
O acto, celebrado na sede de Estrella Galicia, contou coa presenza do director deportivo do club, Tito Díaz, e do delegado de Hijos de Rivera en Lugo, Alberto Graña.
Durante o encontro, Tito Díaz quixo destacar e agradecer o apoio constante e histórico de Estrella Galicia ao Río Breogán, por ser un dos patrocinadores fundamentais na traxectoria da entidade. Así mesmo, deu a benvida oficial ao xogador, subliñando a súa ampla experiencia na competición e a súa excelente capacidade para adaptarse ás necesidades tácticas do equipo.
Pola súa banda, Edgar Vicedo amosou o seu agradecemento pola confianza que o club e a dirección deportiva depositaron nel. O ala internacional destacou a calurosa acollida recibida no club, no vestiario e na cidade.
Coa chegada de Vicedo, o Río Breogán reforza o seu xogo exterior e achega solidez, coñecemento da liga e polivalencia ao conxunto para afrontar os vindeiros retos da tempada.
