O director xeral do Río Breogán, Salva Arco, e os xogadores Danko Branković e Bakary Dibba, visitaron as instalacións de Maderas Besteiro en Lugo. O encontro serviu para que os membros do club coñecesen de primeira man o traballo dunha das firmas máis senlleiras da provincia, consolidando así un vínculo que une ao deporte de elite coa tradición industrial lucense.
Durante a xornada, percorreron as instalacións da empresa, que destaca polo uso de tecnoloxía de última xeración na fabricación de estruturas de madeira de calquera complexidade. Os celestes tiveron a oportunidade de saudar aos empregados e coñecer o proceso de transformación da materia prima no que esta empresa, fundada en 1930, se mantén á vangarda do sector.
A relación entre as dúas entidades vai máis alá do patrocinio convencional, xa que Maderas Besteiro colabora activamente no asesoramento e mellora das infraestruturas do club. Entre os seus proxectos destacan a fabricación e instalación de plataformas de accesibilidade para persoas con mobilidade reducida, así como diversas intervencións de mellora nos palcos e nos vestiarios, facilitando unha mellor experiencia para deportistas e seareiros.
Esta colaboración sitúa á empresa lucense dentro do grupo de #empresasquefanequipo, un selo que pon en valor o apoio do tecido empresarial local ao proxecto deportivo do Breogán.
