CB Breogán

O baloncesto de elite trasladouse á localidade lucense de Taboada. O CPI San Tomé do Carballo vestiuse de gala para recibir a visita de Erik Quintela e Jordan Walker, xogadores do Río Breogán, nunha xornada marcada pola ilusión dos máis novos e a posta en valor da vida sa.

Unha charla sobre o esforzo e o benestar

O recibimento tivo lugar no salón de actos do centro, onde o profesorado, a dirección e o alumnado prepararon unha calorosa benvida. Nun ambiente distendido, os estudantes converteron o acto nunha rolda de prensa improvisada, lanzando preguntas sobre o día a día dun deportista profesional.

Tanto o capitán lucense como o base norteamericano coincidiron en dar consellos fundamentais que van máis alá da pista:

• A nutrición: A importancia de comer ben para render nos estudos e no deporte.

• O descanso: O sono como ferramenta clave para afrontar o día a día "en plena forma".

Baloncesto e autógrafos no patio

Trala teoría, chegou a acción. Despois de asinar ducias de autógrafos e de posar para as fotos de rigor, a actividade trasladouse ao patio do colexio. Alí, os nenos e nenas compartiron cancha cos seus ídolos, participando nunha sesión de lanzamento a canastra e recibindo as indicacións de Walker e Quintela.

Como non podía ser doutro xeito, a curiosidade sobre Máximus, a mascota oficial do club, estivo moi presente. Aínda que nesta ocasión non puido viaxar, os xogadores non descartaron que o popular león breoganista visite Taboada no futuro.

Impulso ao deporte na provincia

Esta iniciativa forma parte do programa impulsado pola Vicepresidencia da Deputación de Lugo en colaboración co CB Breogán. O obxectivo principal é achegar o club e os valores do deporte aos centros escolares e diversos colectivos de toda a provincia de Lugo, fortalecendo o vínculo entre o equipo e a súa afección.

Desde o club agradecemos o excelente trato recibido polo equipo docente e os alumnos de Taboada, agardando volver velos pronto, posiblemente animando desde as bancadas do Pazo.