CB Breogán

A Basketball Champions League (BCL) confirmou a lista de equipos que participarán na súa undécima edición, e o conxunto celeste volverá levar o nome de Lugo polo continente competindo na rolda de clasificación.

Un total de 61 clubs de toda Europa postuláronse para entrar na competición, o que demostra o enorme prestixio do torneo. Deles, 30 equipos obtiveron o billete directo para a Fase Regular. As dúas últimas prazas en xogo decidiranse nuns esixentes torneos de clasificación onde o Río Breogán será un dos grandes protagonistas.

Un reto maiúsculo ante algún dos mellores do continente

O noso equipo quedou encadrado no grupo de representación de países 2*, que reúne a 16 dos clubs con mellor ranking europeo que non entraron directos. O camiño non será sinxelo: para lograr o billete á Fase Regular, o Breogán terá que proclamarse campión do seu torneo eliminatorio. No horizonte asoman rivais de entidade como o Promitheas Patras grego, o RASTA Vechta alemán ou o SL Benfica portugués, entre outros.

Apunta as datas clave:

A folla de ruta para a marea celeste xa está marcada no calendario:

• Mércores 8 de xullo: Sorteo oficial en Mies, na Patrick Baumann House of Basketball (Suíza). Ese día coñeceremos os nosos rivais directos no cadro e os cruces do torneo.

• Do 14 ao 20 de setembro: Disputa da rolda de clasificación (as sedes confirmaranse proximamente).

• 6 de outubro: Data de inicio da Fase Regular para os equipos que logren a clasificación.

O reto é grande, pero o Río Breogán pelexará con todo para estar entre os mellores de Europa.

 

*Listaxe completa de equipos no grupo 2 de clasificación do Río Breogán:

BC Vienna (AUT); BK Opava (CZE); Wild Warsaw (POL); Fitness First Wurzburg Baskets (GER); Lions of Geneva (SUI); Finish Basketball (ALL); Kolossos H Hotels BC (GRE); Landau Lions (AZE); Manchester Basketball (GBR); Promitheas Patras BC (GRE); Rilski Sportist (BUL); Río Breogán (ESP); SL Benfica (POR); RASTA Vechta (GER); VEF Riga (LAT) e Denizli Basket (TUR).