O Club Baloncesto Breogán continúa reforzando a súa rede de alianzas estratéxicas coa incorporación de The Basket Dream como nova empresa colaboradora. Con este acordo, a entidade pasa a integrarse tamén no Club de Empresas do conxunto celeste.
Esta unión nace co propósito de xerar un impacto positivo no desenvolvemento social e deportivo da provincia de Lugo, impulsando iniciativas orientadas á promoción de hábitos de vida saudables, o fomento da práctica deportiva e a expansión do baloncesto no territorio.
Froito desta alianza, o C.B. Breogán e The Basket Dream colaborarán na organización e dinamización de diversas actividades para todas as idades, entre as que destacan:
• Torneos 3x3.
• Xornadas e eventos de promoción do baloncesto.
• Campamentos e campus de verán.
• Programas formativos vinculados ao deporte base.
Esta alianza estratéxica reforza a aposta do C.B. Breogán por consolidar un proxecto que transcenda o estritamente competitivo. Ao unir forzas con entidades que comparten os seus valores, o club reafirma a súa visión do baloncesto como un motor de transformación social na provincia.
Desde o Club, queremos agradecer a The Basket Dream a súa confianza e compromiso co proxecto breoganista, dándolle a benvida a unha rede empresarial que traballa conxuntamente para impulsar o desenvolvemento do deporte e da sociedade lucense.
Seguimos medrando xuntos.
