O xogador participou nunha sesión no colexio Salesianos de Lugo
Unha clase diferente foi a que tiveron os alumnos do centro Divina Pastora Salesianos este luns coa presenza do xogador do Cafés Candelas.
Fakuade comezou a clase presentándose e falando aos alumnos sobre a súa vida de xogador, as súas orixes, a súa cidade en Estados Unidos e moitos outros temas que escoitaron atentamente os alumnos, que despois cumpriron o encargo de David, o seu mestre habitual, de formular preguntas variadas ao xogador. Unha a unha, Fakuade foi respondendo as cuestións que abarcaron dende os seus gustos persoais en canto a música, cine ou literatura, ata o deporte ou a familia.
Antes de despedirnos dos alumnos houbo tempo para algunha foto de lembranza e autógrafos.
Agradecemos ao centro, ao profesorado e os alumnos o recibimento e agardamos repetir experiencia moi pronto. Vémonos no Pazo.
Esta iniciativa entra dentro do programa patrocinado pola Deputación de Lugo mediante o cal os xogadores participan en proxectos educativos e sociais.
