O club celeste inicia unha tempada na que se celebra o seu medio século de historia e na que homenaxeará a persoas e colectivos que foron clave nos últimos 50 anos. Como non podería ser doutro xeito, o primeiro presidente e un dos seus fundadores, José Ramón Varela Portas, foi o protagonista nun acto emotivo e que ergueu dos ao Pazo dos seus asentos para brindar unha ovación das que quedan para a lembranza.
Alá por 1966, José Ramón xunto aos seus irmáns e outros emprendedores, deron forma a un soño: O de ter un club de baloncesto que se identificara con Lugo e Galicia e chegara a competir entre os mellores, sendo un orgullo para unha masa social dunha cidade que xa gozaba dende había anos dun deporte en pleno desenvolvemento.
Ese soño é realidade 50 anos despois grazas a aqueles pioneiros. José Ramón Varela Portas foi o primeiro presidente e recibiu, emocionado, de mans do actual presidente Jesús Lázare, e acompañado dalgúns dos membros máis novos da familia Varela Portas, unha placa na que se pode ler un texto de agradecemento e admiración a un home que segue a levar o Breogán no corazón.
A emoción invadiu o Pazo e a ovación durou varios minutos. Foi un xeito que tivo o breoganismo de dar as grazas por un sentimento que segue máis vivo que nunca.
Este primeiro acto abre unha serie de homenaxes que se realizarán nos intermedios dos partidos da tempada 2016/2017.
