O equipo ao completo, acompañado polo presidente e membros do consello de administración, dedicarán a xornada completa deste martes 23 de setembro a visitar Monforte de Lemos, onde teñen previsto coñecer o Centro do Viño e completar unha sesión de adestramento conxunto con rapaces e rapazas dos centros escolares da zona.
A actividade ten como obxectivo apoiar o reto de lograr que a Ribeira Sacra sexa recoñecida como Patrimonio da Humanidade, algo que se pode ler nas camisolas de xogo do Breogán dende a pasada tempada e que o equipo leva por todo o territorio español como imaxe dese merecido obxectivo. Ademais, o equipo aproveitará para promover o deporte da canastra entre os escolares da zona.
O equipo ten prevista unha recepción ás 12:00 horas no Concello de Monforte de Lemos. Ás 12:30 horas, o plantel desprazarase a pé ata o Centro do Viño, onde poderán coñecer o museo do viño e onde realizarán unha sesión de fotos de onde sairá a primeira foto oficial de equipo da tempada.
A comida realizarase na “tapería” propia do Centro do Viño.
Pola tarde, a partir das 17:15 horas, o equipo participará na actividade “Adestra co Breogán”, que se desenvolverá no Pavillón Municipal de A Pinguela con rapaces e rapazas dos centros escolares e das escolas deportivas do Concello de Monforte de Lemos. Os xogadores farán concursos de tiro cos rapaces e haberá tempo para autógrafos e fotografías.
A visita realizase coincidindo co inicio da época da vendima, actividade que sitúa á Ribeira Sacra como unha referencia indiscutible dentro do mundo do viño.
